வங்கக் கடலில் உருவாகியுள்ள ‘டிட்வா’ புயல் காரணமாக தமிழ்நாட்டில் பெரும்பாலான இடங்களில் கனமழை பெய்து வருகிறது. புயலானது சென்னை, புதுச்சேரி மற்றும் ஆந்திர கடலோர பகுதிகளை நோக்கி நகர்ந்து வரும் நிலையில், நாளை (நவ.30) கரையை கடக்கும் என்று வானிலை ஆய்வு மையம் தெரிவித்திருக்கிறது.

டிட்வா புயலால் தற்போது இலங்கை முழுவதும் அதி கனமழை பெய்து வரும் நிலையில், புயல் தமிழகம் நோக்கி நகர்ந்து வருவதால் இங்கும் மழை அளவு அதிகரித்து வருகிறது. குறிப்பாக, இந்த புயல் காரணமாக செங்கல்பட்டு, விழுப்புரம், கடலூர், மயிலாடுதுறை ஆகிய 4 மாவட்டங்களுக்கு ரெட் அலர்ட் விடுக்கப்பட்டுள்ளது. இவை தவிர, 14 மாவட்டங்ளுக்கு ஆரஞ்சு அலர்ட் விடுக்கப்பட்டுள்ளது. அதில், சென்னை, காஞ்சிபுரம், திருவள்ளூர், ராணிபேட்டை, புதுக்கோட்டை, தஞ்சாவூர், நாகை, அரியலூர், திருவாரூர் ஆகிய மாவட்டங்களுக்கு மிக கனமழை எச்சரிக்கை விடுக்கப்பட்டுள்ளது.

புயல் காரணமாக, தூத்துக்குடியில் விமான சேவைகள் ரத்து செய்யப்பட்டுள்ளன. அதே போல் சென்னையிலும் 54 விமான சேவைகள் ரத்து செய்யப்பட்டுள்ளன. தமிழகத்தின் பெரும்பாலான மாவட்டங்களில் பள்ளிகளுக்கு விடுமுறை அறிவிக்கப்பட்டுள்ள நிலையில், ஒரு சில மாவட்டங்களில் கல்லூரிகளுக்கும் விடுமுறை அறிவிக்கப்பட்டுள்ளது. புதுச்சேரி உள்ளிட்ட ஒருசில பகுதிகளில் உள்ள பல்கலைக்கழக தேர்வுகளும் ஒத்தி வைக்கப்பட்டுள்ளன.

டிட்வா புயல் காரணமாக நேற்று காலை முதல் திருச்செந்தூர் மற்றும் அதன் சுற்றுவட்டாரப் பகுதிகளில் பரவலாக பலத்த மழை பெய்து வருகிறது. இதனால் திருச்செந்தூரில் இரண்டாவது நாளாக இன்றும் கடல் சீற்றத்துடன் காணப்படுகிறது. ஆனால் அதனை பொருட்படுத்தாமல் கோயிலுக்கு வருகை தந்த பக்தர்கள், கடலில் ஆனந்தமாக புனித நீராடி வருகின்றனர். அவர்களை பாதுகாப்பாகவும், ஆழமான பகுதிக்குள் சென்று நீராட வேண்டாம் என்று பாதுகாப்பு பணியாளர்கள் எச்சரித்து வருகின்றனர்.

மேலும் கோயில் முன்புள்ள நாழிக்கிணறு பகுதியில் இருந்து அய்யா கோவில் வரையிலும் சுமார் 500 மீட்டர் நீளத்திற்கு இரண்டாவது நாளாக கடல் சுமார் 100 அடி உள்வாங்கி காணப்படுகிறது. இதனால் பச்சை நிற பாசி படிந்த பாறைகள் வெளியே தெரிகின்றன. அதன் மேல் நின்று அச்சமில்லாமல் பக்தர்கள் புகைப்படம் வீடியோ எடுத்து வருகின்றனர்.

பூண்டி சத்தியமூர்த்தி நீர்த்தேக்கத்திலிருந்து 2500 கன அடி நீர் வெளியேற்றப்பட்டு வருகிறது. சென்னை மக்களின் குடிநீர் தேவை பூர்த்தி செய்யக்கூடிய முக்கிய நீர்த்தேக்கங்களின் ஒன்றான சத்தியமூர்த்தி சாகர் பூண்டி நீர்த்தேக்கத்தில் முன்னெச்சரிக்கை தடுப்பு நடவடிக்கை தொடர்பாக திருவள்ளுர் மாவட்ட கண்காணிப்பு அலுவலர் மற்றும் தமிழ்நாடு மின்னணுவியல் கழக நிர்வாக இயக்குநர் கார்த்திகேயன் மற்றும் திருவள்ளூர் மாவட்ட ஆட்சித் தலைவர் பிரதாப் ஆகியோர் நேரில் பார்வையிட்டு ஆய்வு மேற்கொண்டனர்.

டிட்வா புயலால் தமிழ்நாட்டில் தொடர்ந்து மழை பெய்து வரும் நிலையில், முதலமைச்சர் அறிவுறுத்தலின்படி அனைத்து மாவட்டங்களிலும் முன்னெச்சரிக்கை ஏற்பாடுகள் தயார் நிலையில் இருப்பதாக தலைமைச் செயலாளர் முருகானந்தம் தெரிவித்துள்ளார்.மேலும், மீனவர்கள் கடலுக்கு செல்ல வேண்டாம் என அறிவுறுத்தல் செய்யப்பட்டுள்ளது என்றும், டெல்டா உள்ளிட்ட அனைத்து மாவட்டங்களிலும் மாநில பேரிடர் மீட்பு குழுவினரும் தயார் நிலையில் உள்ளர் என்று குறிப்பிட்டுள்ளார்.

மாநில அவசர கால கட்டுப்பாட்டு மையத்தில் இருந்து தேவையான அறிவுறுத்தலும் வழங்கப்பட்டு வருகிறது என்றும் மக்கள் தங்குவதற்கு தேவையான முகாம்களும், அங்கு உணவு, மருந்து உள்ளிட்ட அத்யாவசிய தேவைகள் அனைத்தும் தயார் நிலையில் உள்ளன என்றும் தலைமைச் செயலாளர் முருகானந்தம் தெரிவித்துள்ளார்.இலங்கை கடலோரப் பகுதிகள் மற்றும் அதை ஒட்டிய தென்மேற்கு வங்க கடலில் நிலவிய டிட்வா புயல் கடந்த ஆறு மணி நேரத்தில் மணிக்கு 8 கிலோ மீட்டர் வேகத்தில் வடக்கு-வடமேற்கு திசையில் நகர்ந்து இன்று காலை 5.30 மணி அளவில் தென்மேற்கு வங்க கடல் மற்றும் அதை ஒட்டிய வடக்கு இலங்கை மீது மையம் கொண்டுள்ளது.யாழ்ப்பாணத்திற்கு கிழக்கு-தென்கிழக்கில் சுமார் 80 கிமீ, திருகோணமலைக்கு வடக்கு-வடமேற்கில் 110 கிமீ தொலைவில் மையம் கொண்டுள்ளது.

டிட்வா புயலானது தொடர்ந்து வடக்கு-வடமேற்கு நோக்கி நகர்ந்து நவம்பர் 30 ஆம் தேதி அதிகாலை வட தமிழ்நாடு, புதுச்சேரி மற்றும் அருகிலுள்ள தெற்கு ஆந்திரப் பிரதேச கடற்கரைகளுக்கு அப்பால் உள்ள தென்மேற்கு வங்கக்கடலை வந்தடையும் என வானிலை ஆய்வு மையம் தெரிவித்துள்ளது.