பெங்களூருவில் பைக் டாக்சி ஓட்டுனரால் இளம் பெண் பாலியல் தொந்தரவுக்கு ஆளாக்கப்பட்டதாக வீடியோ ஒன்று வைரலாகி வருகிறது.

கர்நாடக மாநில தலைநகரான பெங்களூருவின் வில்சன் கார்டன் பகுதியில் உள்ள தங்கும் விடுதியில் இளம் பெண் ஒருவர் தங்கி உள்ளார். இவர் கடந்த நவம்பர் 6ஆம் தேதி மாலை வேலை விஷயமாக சர்ச் தெருவுக்கு சென்றிருந்தார். அங்கிருந்து தனது தங்கும் விடுதிக்கு செல்வதற்காக ரேபிடோ பைக் டாக்ஸியில் முன்பதிவு செய்தார். அதன்படி இளைஞர் ஒருவர் பைக் டாக்ஸியை ஓட்டி வந்தார். அந்த பைக் டாக்ஸியில் இந்த இளம் பெண்ணும் ஏரி அமர்ந்து பயணித்தார்.

இருசக்கர வாகனத்தை ஓட்டிய அந்த இளைஞர் இளம்பெண்ணின் தொடைகளில் கை வைத்து பாலியல் தொல்லை கொடுத்தபடி வந்துள்ளார். இதனால் அதிர்ச்சி அடைந்த அந்த பெண் பயணத்தை தொடர விருப்பம் இல்லாமல், தான் இறங்கிக் கொள்வதாக கூறி பைக் டேக்ஸியை நிறுத்தும்படி கூறி இருக்கிறார். ஆனால், இதனை பொருட்படுத்தாத அந்த பைக் டாக்ஸியை அந்த இளைஞர் தொடர்ந்து ஓட்டிச் சென்றுள்ளார்.
இதனிடையே தனது தங்கும் விடுதி அருகே வசிக்கும் இளைஞர் ஒருவருக்கு தனக்கு நேர்ந்த சம்பவங்கள் குறித்து அந்த இளம் பெண் செல்போனில் வாட்ஸ் அப் மூலம் தகவல் தெரிவித்துள்ளார். இதனால் அந்த பைக் டேக்ஸி தங்கும் விடுதியை அடைந்தபோது அங்கு வந்த அந்த இளம் பெண்ணுக்கு தெரிந்த இளைஞர், ரேபிடோ பைக் டாக்ஸி ஓட்டுனரை கண்டித்தார்.

மேலும் அந்த இளம் பெண் பைக் டாக்ஸி ஓட்டுநரால் பாலியல் தொல்லைக்கு ஆளாக்கப்பட்ட சம்பவத்தை வீடியோவாகவும் எடுத்து வைத்திருந்தார். இந்த வீடியோக்களை அந்த இளம் பெண் தனது இன்ஸ்டாகிராம் பக்கத்தில் பதிவேற்றம் செய்து தனக்கு நேர்ந்த இன்னல்கள் குறித்து அவர் விவரித்துள்ளார். மேலும் பைக் டாக்ஸி ஓட்டுனர் மற்றும் அவரது இருசக்கர வாகனத்தின் பதிவு எண் உள்ளிட்ட தகவல்களையும் அவர் அந்த வீடியோவில் காட்டியுள்ளார். இந்த வீடியோ வைரலாகி பெரும் பரபரப்பை ஏற்படுத்திய நிலையில் வில்சன் கார்டன் காவல் நிலையத்தில் அந்த இளம் பெண் இது தொடர்பாக அளித்த புகாரின் பேரில் வழக்குப்பதிவு செய்யப்பட்டு போலீசார் தீவிர விசாரணை மேற்கொண்டனர்.

இளம் பெண்ணுக்கு பாலியல் தொந்தரவு அளித்த ராபிடோ பைக் டாக்ஸி ஓட்டுனரான பெங்களூரு உல்லால் முனியப்பா லேஅவுட் பகுதியைச் சேர்ந்த லோகேஷ் (வயது 28) என்பவர் கைது செய்யப்பட்டுள்ளார். அவரிடம் போலீசார் தொடர்ந்து விசாரணை நடத்தி வருகின்றனர்..