கர்நாடக மாநிலம் விஜயாப்புரா மாவட்டம் கோல்கும்பாஸ் போலீஸ் நிலையத்திற்கு உட்பட்ட அமன் காலனியில் வசித்து வந்தவர் தயபா (வயது 25). இவருடன் திருமணம் செய்து கொள்ளாமல் சமீர் என்கிற பி.கே. இனந்தர் (26) என்பவர் வசித்து வந்தார். அதாவது கணவன்-மனைவியாக இருவரும் வாழ்ந்து வந்துள்ளனர்.

சமீபகாலமாக தயபா, சமீர் இடையே அடிக்கடி தகராறு ஏற்பட்டு வந்ததாம். அதுபோல் சம்பவத்தன்று இரவும் அவர்கள் இடையே சண்டை ஏற்பட்டதாக தெரிகிறது. அப்போது தயபா, தனது சகோதரர் அஸ்லம் பகவானுடன் சேர்ந்து சமீரை கழுத்தை நெரித்துக் கொலை செய்துள்ளார். பின்னர் அங்கிருந்து அஸ்லம் பகவான் தப்பிச் சென்றுள்ளார். கொலையான சமீர் உடலுடன் அதே வீட்டில் தயபா விடிய, விடிய தங்கியிருந்துள்ளார்.

நேற்று காலை 8 மணி அளவில் தயபா, கோல்கும்பாஸ் போலீஸ் நிலையத்திற்கு சென்றுள்ளார். அங்கு தன்னுடன் திருமணம் செய்து கொள்ளாமல் வசித்து வந்த காதலனை கழுத்தை நெரித்து கொன்றதாக போலீசாரிடம் கூறி தயபா சரண் அடைந்தார்.

இதையடுத்து அவரையும், அவருக்கு உடந்தையாக இருந்த அவரது சகோதரர் அஸ்லம் பகவானையும் போலீசார் கைது செய்தனர். பின்னர் கொலை நடந்த வீட்டுக்கு போலீசார், கைதான 2 பேரையும் அழைத்துச் சென்றனர். அங்கு கொலை செய்யப்பட்டு சமீர் பிணமாக கிடந்தார். இதையடுத்து அவரது உடலை போலீசார் மீட்டு பிரேத பரிசோதனைக்காக விஜயாப்புரா அரசு ஆஸ்பத்திரிக்கு அனுப்பிவைத்தனர். மேலும் கைதான 2 பேரிடமும் போலீசார் தீவிர விசாரணை நடத்தினர்.