இன்னும் 100 பிறவிகள் எடுத்தாலும் அத்தனை பிறவியிலும் நடிகராகவே பிறக்க விரும்புகிறேன் என்று நடிகர் ரஜினிகாந்த் உணர்ச்சி பொங்க கூறினார்.

மத்திய தகவல் மற்றும் ஒளிபரப்பு அமைச்சகம் மற்றும் கோவா அரசின் சார்பில் சர்வதேச திரைப்பட விழா மாநில தலைநகர் பனாஜியில் ஆண்டுதோறும் நடத்தப்பட்டு வருகிறது.இந்த ஆண்டு 56-வது சர்வதேச திரைப்பட விழா கோவாவில் கடந்த 20-ம் தேதி துவங்கியது. விழாவின் நிறைவு நாளான இன்று தமிழ் திரையுலகின் சூப்பர் ஸ்டாராக இன்றைக்கும் ரசிகர்களால் கொண்டாடப்படும் ரஜினிகாந்துக்கு 'வாழ்நாள் சாதனையாளர் விருது' வழங்கி கெளரவிக்கப்பட்டது.

விழாவில் ரஜினிகாந்த் பேசும்போது, " எனக்கு வாழ்நாள் சாதனையாளர் விருது வழங்கியதற்காக மத்திய அரசுக்கு நெஞ்சார்ந்த நன்றிகளை தெரிவித்துக் கொள்கிறேன். சினிமாவையும், நடிப்பையும் மிகவும் நேசிப்பதால் 50 ஆண்டுகள், வெறும் 10 ஆண்டுகளை போல் உருண்டோடிவிட்டதை போல் உணர்கிறேன்," என்றார்.அவர் பேசும்போது, "இன்னும் 100 பிறவிகள் எடுத்தாலும் அத்தனை பிறவியிலும் நடிகராகவே (ரஜினிகாந்த் ஆகவே) பிறக்க விரும்புகிறேன்" என்று ரஜினி உணர்ச்சி பொங்க பேசினார்.