தமிழக அரசியலில் தற்போது பெரும் பரபரப்பை ஏற்படுத்தும் வகையில், தமிழக வெற்றிக்கழகத் தலைவர் விஜய் அவர்கள் வரும் செப்டம்பர் 13ஆம் தேதி முதல் மாநிலம் முழுவதும் சுற்றுப்பயணம் மேற்கொள்ள உள்ளதாகக் கூறப்படுகிறது. எதிர்வரும் சட்டப்பேரவைத் தேர்தலை முன்னிட்டு மக்களோடு நேரடியாகச் சந்தித்து உரையாடும் நோக்கத்தோடு விஜய் தனது சுற்றுப்பயணத்தை திருச்சியில் இருந்து தொடங்குகிறார் எனத் தெரிவிக்கப்பட்டுள்ளது.

இந்த சூழ்நிலையில், த.வெ.கவின் முக்கிய இளைஞர் தலைவரான ஆதவ் அர்ஜூனா தனது எக்ஸ் சமூக வலைதளப் பக்கத்தில் இந்த சுற்றுப்பயணத்தைச் சுற்றியுள்ள அரசியல் சூழ்நிலைகளையும், அதனைத் தடுக்க அரசாங்கம் மேற்கொள்ளும் நடவடிக்கைகளையும் கடுமையாக விமர்சித்துள்ளார்.

அவர் வெளியிட்ட பதிவில், “புரட்சித் தலைவர் எம்.ஜி.ஆர். அன்றைய திமுக அராஜக அரசுக்கு எதிராக மக்களை சந்திக்கும் இயக்கத்தை முன்னெடுத்து தமிழகம் முழுவதும் சுற்றுப்பயணம் மேற்கொண்டபோது, அதை தங்கள் அதிகாரம் கொண்டு அடக்க முயன்றது அன்றைய ஆளும் அரசு. ஆனால் அந்த அதிகார ஆட்டத்திற்கு அடுத்த தேர்தலிலேயே மக்களே முடிவுரை எழுதியார்கள். இன்று அதே போன்று எங்கள் தலைவரும், தமிழக மக்களின் ஒரே நம்பிக்கையுமான த.வெ.க தலைவர் விஜய் அவர்களின் சுற்றுப்பயணத்தை தடுக்க இன்றைய திமுக அரசு காவல்துறையின் மூலம் அதிகார அழுத்தம் செலுத்துகிறது” எனக் கூறியுள்ளார்.

மேலும், “இது அரசின் அச்சத்தின் வெளிப்பாடாகவே கருதப்பட வேண்டும். மக்களிடம் தலைவருக்கு இருக்கும் பேராதரவை தாங்க முடியாமல், மக்கள் ஆதரவை இழக்கும் பயத்தில் திமுக அரசு நடவடிக்கைகளை எடுக்கிறது. ஜனநாயக நாட்டில் எந்தத் தலைவரும் மக்களைச் சந்திப்பதை அதிகார சக்திகளால் தடுக்க முடியாது. வரலாற்று ரீதியாக பார்க்கும்போது, மக்களை சந்திக்க வந்த தலைவர்களைத் தடுக்க நினைத்தவர்களை மக்களே அரசியலிலிருந்து அகற்றியிருக்கிறார்கள். வரலாறே இதற்கு சாட்சியாக நிற்கிறது” என்றும் அவர் பதிவு செய்துள்ளார்.